Is féidir leis an bpríomhiarratasóir ar Dhámhachtain na nÁiteanna Ildánacha a bheith ina údarás áitiúil, ina eagraíocht ealaíon nó ina eagraíocht forbartha pobail. Cibé an príomhiarratasóir, ní mór dó, ar a laghad: comhoibriú leis an dá chineál eagraíochta eile agus iad a chur san áireamh mar chomhpháirtithe d’fhonn cur chuige inbhuanaithe ón mbun aníos don chruthaitheacht agus don fhorbairt ealaíon áitiúil a spreagadh.  Cruthóidh sé deiseanna nua le haghaidh pobail áitiúla chun taithí ealaíon a chinneadh, a cheapadh agus chun bheith rannpháirteach iontu, sna háiteanna ina bhfuil cónaí orthu. 

Beidh tograí á lorg againn atá bunaithe ar shócmhainní; is é sin, tograí ina bhféachfar iontu ar cad atá ann sa cheantar ar féidir tógáil air agus is féidir a fhorbairt, in ionad tograí ina bhféachfar iontu ar cad atá in easnamh i gceantar ar bith. Cur chuige cuimsitheach agus ilghnéitheach a bheidh ann, ceann atá fite fuaite le cleachtais atá gníomhach go sóisialta agus le prionsabail na forbartha pobail. Tógfar ann ar láidreachtaí cultúrtha atá ann cheana féin, beidh sé faoi stiúir rannpháirtíocht agus smaointe an phobail agus beidh tacaíocht ó ealaíontóirí ann dó.

Is féidir le hiarratasóirí cur isteach ar Dhámhachtain na nÁiteanna Ildánacha nó ar an Dámhachtain Taighde agus Forbartha. Chun a bheith i dteideal iarratas a chur isteach, ní mór go mbeadh an t‑iarratasóir ina údarás áitiúil, ina eagraíocht ealaíon nó ina eagraíocht forbartha pobail.

1. Dámhachtain na nÁiteanna Ildánacha

 Dámhachtain ilbhliantúil a bheidh ann a dhéanfar a bhronnadh in imeacht trí bliana. Clúdófar ceapachán Chomhordaitheoir na nÁiteanna Ildánacha agus buiséad an chláir sa dámhachtain. Is é €330,000 an t-uasmhéid gur féidir cur isteach air thar thrí bliana (€90,000, €115,000, €125,000. Sa bhliain 2023, meastar go mbronnfar suas le ceithre dhámhachtain.

2. Dámhachtain Taighde agus Forbartha na nÁiteanna Ildánacha

Dámhachtain eisceachtúil a bheidh sa dámhachtain sin, ar féidir í a tharraingt anuas in imeacht ocht mí dhéag. Clúdófar táillí a bhaineann le taighde agus costais chomhairliúcháin sa dámhachtain. Is é €35,000 an t-uasmhéid gur féidir cur isteach air. Sa bhliain 2023, meastar go mbronnfar suas le trí dhámhachtain.

Beidh iarratais ar oscailt 28 Feabhra, 2023.

Íoslódáil Ceisteanna Coitianta le haghaidh Áiteanna Cruthaitheacha anseo

Le haghaidh aon fhiosrúcháin eile, seol ríomhphost chuig Eimear.Kelleher@artscouncil.ie