Tairiscint ar Sholáthar Seirbhísí Comhairleoireachta Ailtireachta  

Is ar an gComhairle Ealaíon atá an phríomhfhreagracht as foirm ealaíne na hailtireachta a fhorbairt in Éirinn. Comhlíonaimid an fhreagracht sin trí fhorbairt chruthaitheach ailtirí agus idirghníomhaíocht an phobail le cúrsaí ailtireachta a fhorbairt, ag úsáid roinnt gradam agus deontas do dhaoine aonair agus d’eagraíochtaí. Níl aon bhaint dhíreach againn leis na gnéithe trádála/tionsclaíochta den earnáil.

Is mian leis an gComhairle Ealaíon Comhaontú Creata Aon Pháirtí do Sholáthar Seirbhísí Comhairleoireachta Ailtireachta a bhunú, a fhreastalóidh ar riachtanais na heagraíochta ó thaobh sheachadadh agus chaighdeán na seirbhísí. Mairfidh téarma an chomhaontaithe bliain amháin agus beidh rogha ann tréimhse bhreise amháin sé mhí a chur leis. Maidir leis an tairgeoir a n-éireoidh leis, beidh an saineolas agus an taithí a theastaíonn aige chun comhairle chriticiúil a thabhairt ar shaothar ealaíonta agus le cuidiú leis an gComhairle sa phróiseas meastóireachta ar iarratais a fhaightear ó dhaoine aonair agus ó eagraíochtaí do ghradaim, scéimeanna, deontais agus deiseanna maoinithe eile a chuireann an Chomhairle ar fáil (bíodh sé sin ar bhonn neamhspleách nó i gcomhar le gníomhaireacht eile).

Déantar iarratas ar an gconradh seo go heisiach trí phróiseas tairisceana poiblí a chuirfear ar fáil tríd an suíomh gréasáin soláthair eTenders: www.etenders.gov.ie. Ba cheart na tograí ar fad a chur isteach faoi 12:00 Dé hAoine, 4 Nollaig 2020. Ba cheart aon cheist i dtaobh an chonartha seo a chur de réir mar a leagtar amach san fhógra tairisceana, agus níor cheart iad a chur chuig an gComhairle Ealaíon.