Aithníonn an Chomhairle Ealaíon an éagsúlacht shaibhir de réimsí cleachtais foirm ealaíne a chuireann féilte i láthair agus an ról ríthábhachtach atá acu chun rochtain an phobail ar na healaíona a leathnú. Bíonn féilte lárnach go minic do phobail agus iad ag cur a n‑aitheantas áitiúil i láthair agus á bhfiosrú, rud a chuireann rochtain ar fáil ar na healaíona agus a chruthaíonn deiseanna d’ealaíontóirí a gcleachtas a fhorbairt.

 Russango Family, First Fortnight. Tramline, Dublin 2017. (Grianghraf: Kieran Frost) 

Tá an comhthéacs straitéiseach maidir le tacaíocht na Comhairle Ealaíon d’fhéilte agus imeachtaí agus do gach foirm ealaíne agus gach réimse cleachtas ealaíon eile leagtha amach in Saothar Ealaíne Iontach a Tháirgeadh: Straitéis na Comhairle Ealaíon (2016–2025) (PDF, 3.29 MB). Déantar cur síos ann ar conas a stiúrfaimid forbairt na n-ealaíon in Éirinn sna deich mbliana seo amach romhainn. Tá cúig réimse tosaíochta inár straitéis: an t-ealaíontóir; rannpháirtíocht an phobail; straitéis infheistíochta; pleanáil spásúil agus dhéimeagrafach; agus cumas a fhorbairt. Tá an Beartas Féilte reatha ailínithe leis na príomhchuspóirí agus torthaí inmhianaithe in Saothar Ealaíne Iontach a Tháirgeadh agus is féidir amharc air anseo Beartas agus Straitéis na bhFéilte 2020–2025.

Cuireann siad réimse tacaíochtaí airgeadais ar fáil do mhúnlaí féile éagsúla

Is é ról na Comhairle Ealaíon tacú le féilte ilghnéitheacha agus éagsúla agus chun slabhra tacaíochtaí maoinithe a chur ar fáil a spreagann: samhailtí a bhfuil suntasacht náisiúnta agus idirnáisiúnta leo agus an cleachtas is fearr, samhailtí a mhéadaíonn deiseanna do rannpháirtíocht an phobail nó a fhorbraíonn saothar ealaíontóra/foirm ealaíne, tacaíocht d’fhéilte beaga chun taithí ealaíon ardchaighdeáin a sheachadadh do lucht féachana agus cláir féile atá ag obair leis an bpobal áitiúil, agus ábhartha dó.

Is minic gur buaicphointí cultúrtha na bliana iad na féilte a reáchtáiltear i bpobail ar fud na hÉireann, idir bheag agus mhór. Tugann an Chomhairle Ealaíon tacaíocht airgeadais do roinnt féilte a phléann le foirm ealaíne amháin (m.sh. amharclannaíocht, damhsa, scannán) agus tugtar tacaíocht do na féilte sin i gcomhthéacs na mbeartas a bhaineann leis na foirmeacha ealaíne sin. Tacaímid le cuid mhór féilte ealaíon ildisciplíneach chomh maith, is iad siúd na féilte sin a bhfuil clár foirmeacha éagsúla ealaíne acu, lena n-áirítear litríocht, ceol, ealaíona sráide, téatar, amharcealaíona agus réimsí éagsúla de chleachtadh na n-ealaíon.

Tugann an Chomhairle Ealaíon tacaíocht airgeadais d’fhéilte ealaíon:

• a bhfuil ról an-tábhachtach acu nó atá lárnach in infreastruchtúr na n-ealaíon
• a chuireann le saothar an ealaíontóra nó forbairt cleachtais foirme ealaíne
• a chuireann taithí ar ealaíona ardcháilíochta ar fáil agus a thugann tosaíocht do chláir a bhfuil baint acu le pobail áitiúla nó pobail arb ábhar spéise iad, nó atá ábhartha dóibh.
• a bhfuil ról an-tábhachtach acu i gcur chun cinn agus i seachadadh foirme ealaíne nó cleachtais ealaíon
• a léiríonn comhpháirtíochtaí éifeachtacha áitiúla, náisiúnta nó idirnáisiúnta sna healaíona
• a chuireann deiseanna ar fáil don phobal mór a bheith páirteach i dtaithí ar ealaíona ardcháilíochta.

Tugann an Chomhairle Ealaíon tosaíocht d’fhéilte a chuireann le forbairt ealaíona sráide agus seónna ealaíon in Éirinn agus ceaptar gur timpeallachtaí riachtanacha iad leis na saothair seo a thástáil agus a chur i láthair don phobal mór.

Rinne an Chomhairle Ealaíon na nithe seo in 2022: 

• chuir sí €2.17 milliún de thacaíocht mhaoinithe ar fáil do 137 clár féile atá beag nó ar mheánmhéid ar fud na hÉireann 
• thacaigh sí le 15 choimisiún arna stiúradh ag féilte agus le 27 tionscadal a dhéanann acmhainn a fhorbairt chun tacú le forbairt ealaíne agus eagraíochtúla na bhféilte trí €477,146 a chaitheamh orthu agus 2 Chónaitheacht Idirnáisiúnta dar luach €94,000 a chur ar fáil.
• thacaigh sí leis na hÚdaráis Áitiúla le maoiniú chun féilte a chur ar siúl ina gceantair áitiúla 
• chuir sí tacaíocht bhliantúil ar fáil mar Mhaoiniú Straitéiseach do 6 fhéile ildisciplíneacha agus maoiniú do 13 fhéile foirm ealaíne aonair ar fud na hÉireann. B’ionann an infheistíocht iomlán i maoiniú straitéiseach do réimse na féile ealaíon in 2022 agus €8.2 milliún 
• rinne sí infheistíocht dar luach €1.64 milliún i gcláir féile agus i dtionscadail forbartha féile trí Mhaoiniú Deontais do na hEalaíona i 19 bhféile mheánmhéide ar fud na hÉireann. 

B’ionann infheistíocht bhliantúil in 2022 ina hiomláine agus €12,597,288.