(Creidiúint Grianghrafadóireachta: Matt Foley)

Gearrbheathaisnéis:

Is Áth Cliathach atá ina taibheoir rince agus déantóir í Zoë Ashe-Browne. Bronnadh céim de chuid an English National Ballet School (Scoil Bhailé Náisiúnta Shasana) uirthi in 2009 agus tá sí tar éis damhsa a dhéanamh le Bailé Náisiúnta na hÉireann, Bailé Náisiúnta Shasana agus Bailé Ceoldrámaíochta Flanders (ar a dtugtaí an Bailé Ríoga Flanders) agus bhí sí ina haoi-rinceoir le Company Eastman Sidi Larbi Cherkaoui. Déanann a gairmréim léiriúcháin eolas dá cuid saothar cóiréagrafaíochta, agus is féidir cleachtais chlasaiceacha, chomhaimseartha agus ildisciplíneacha a fheiceáil sa mhéid a chruthaíonn sí. Chuir Zoë dhá shaothar dá cuid i láthair le gairid ag an bhFéile What Next 2022 i Luimneach.

Cad a rinne tú le do Dhámhachtain Sparánachta?

Chuir an dámhachtain sparánachta an t-am agus an spás ar fáil dom chun téacs gluaiseachta a chruthú in éineacht le 3 rinceoirí ar dtús agus 4 i ndiaidh tamall eile. Toisc go rabhamar i mbun taighde agus forbartha le linn na paindéime, d’fhág mé páirtíocht damhsa agus cóngaracht fhisiciúil ar lár, agus bhí mé ag obair le dhá lánúin ar dhá thaobh de phasáistí samhalta. Mar gheall ar na paraiméadair seo, bhí orm díriú isteach ar theanga na gluaiseachta don rinceoir aonair. Seo an réimse inar chuir mé le mo chumas ealaíonta, a bhuí leis an sparánacht seo. Cuireadh an saothar críochnaithe ar stáitse ag Féile Gent i Mí Mheán Fómhair 2020 agus leis an mBailé Ceoldrámaíochta Flanders in Antuairp níos déanaí. Chonacthas an saothar céanna in Éirinn ag an bhFéile What Next 2022 i Luimneach.

Cén chaoi a ndeachaigh Dámhachtain Sparánachta i bhfeidhm ort mar ealaíontóir/ ó thaobh na gairme de?

Mar gheall ar an dámhachtain seo, cuireadh am luachmhar ar fáil dom chun dul i dteagmháil le mo chleachtas ar bhealach nach mbeadh indéanta seachas sin. Agus an deis agam bonneagar gearrthéarmach a chruthú in éineacht le healaíontóirí i spás damhsa, tascanna, téamacha agus conairí a fhiosrú mar chomharghrúpa, bhí mé in ann dul chun cinn a dhéanamh ó thaobh an eolais a bhí agam cheana de.

Cuireann an tacaíocht an spás agus an t-am ar fáil dom chun teagmháil a dhéanamh le mo chleachtas arís, agus mé i mbun mo gairmréim léiriúcháin ag an am céanna. Mar a imíonn gach bliain, forbraíonn an t-eolas fisiciúil atá agam agus ligeann na dámhachtainí sparánachta a fhaighim agus mé ag rince dom an t-iarann a bhualadh nuair atá sé dearg ó thaobh na cruthaitheachta de.

Conas a dhéanfá cur síos ar do phróiseas cruthaitheacha?

Bíonn go leor do-thuarthachta i gceist in ainneoin an ullmhúcháin a bhíonn á dhéanamh agam roimh an bpróiseas cruthaitheachta. Má thugaim tascanna agus treoracha soiléire dom féin don lá, is mó ná a mhalairt a thagann smaoineamh suimiúil ar an saol go nádúrtha sa stiúideo. Ní tharlaíonn tada gan mhachnamh domsa.

Céard é, dar leat, an dúshlán is mó atá agat mar ealaíontóir?

An iomarca machnaimh a dhéanamh maidir leis an obair.

Cad í an chomhairle ab fhearr a cuireadh ort nuair a bhí tú ag teacht chun cinn mar ealaíontóir?

Lean ort le do chuid saothair, ná bí éisealach agus tú ag tosú amach. Ní dhéanfaidh smaoineamh an treabhadh duit, caithfear dul agus é a chur i bhfeidhm.

Cad é an duine/rud faoi leith a chuaigh i bhfeidhm is mó ar do chleachtas?

B’iomaí duine a chuaigh i bhfeidhm orm, ar fháthanna éagsúla. Tá déantóirí ina measc a bhfuil físeanna dochreidte, stíleanna cumarsáide iontacha agus fuinneamh stiúideo atá tógálach acu.

Ba iad na daoine a chuaigh i bhfeidhm is mó orm go dtí seo ná Sidi Larbi Cherkaoui, Alain Platel, Bryan Arias agus Crystal Pite.

Cad a dhéanfaidh tú anois?

Táim tar éis obair a chur i gcrích mar stiúrthóir gluaiseachta ar scannán neamhspleách Éireannach (nach bhfuil teideal aige go fóill), agus d’oibrigh mé le banna Éireannach ar fhíseán ceoil dá gcuid a sheolfar níos déanaí i mbliana.

Tá mionsraith podchraoltaí nach mór curtha i gcrích agam in éineacht le Makeshift Company. Fuair sé seo tacaíocht ó Ghradam Markievicz 2021. Don phodchraoladh, chuir mé seisear cóiréagrafaithe ban de chuid na hÉireann faoi agallamh maidir lena gcleachtais chóiréagrafaíochta agus a gcuid saothair.

Ag obair le Bailé Ceoldrámaíochta Flanders (mar rinceoir) chun dhá shaothar le Sidi Larbi Cherkaoui agus Pina Bausch a léiriú den chéad uair.

Beidh mé ag freastal ar Fhéile Avignon an samhradh seo, agus saothar de chuid an chóiréagrafaí Bheilgigh Jan Martens á léiriú.