Tá an Chomhairle Ealaíon, i gcomhar le Coláiste na nEalaíon, an Léinn Cheiltigh agus na nEolaíochtaí Sóisialta (UCC), agus leis an Scoil Ceoil agus Amharclannaíochta (UCC), tar éis Desi Wilkinson, taibheoir agus múinteoir a bhfuil cáil idirnáisiúnta air, a cheapadh mar Ealaíontóir Traidisiúnta Cónaithe i gColáiste na hOllscoile Corcaigh le haghaid 2015-2016. Cuirfidh Wilkinson sraith ceolchoirmeacha, ceardlann agus seimineár i láthair i rith a chónaitheachta bliana, a thosaigh i mí Dheireadh Fómhair 2015.

Ceoltóir traidisiúnta Éireannach a bhfuil moladh idirnáisiúnta faighte aige agus a bhfuil taithí leathan aige ar thairbhiú gairmiúil ceoil is ea Desi Wilkinson. Agus cáil air mar gheall ar an spéis atá aige ina lán cineálacha éagsúla ceoil, tá Desi in  thaibheoir agus ina mhúinteoir cleachta a bhfuil an-ghean air. Is as Beal Feirste ó dhúchas do Desi agus, cé go bhfuil sainstíl agus sainteicníc Uladh aige, tá traidisiúin fliúit Shligigh agus Ros Comáin le brath ina chuid saothair freisin. Seinneann sé fliúit cheolchoirme, feadóg stáin, fidil, píb mhála agus cláirnéid agus tá spéis láidir aige san amhránaíocht thraidisiúnta. Tá saothar taibhithe agus taifeadta aige le raon leathan ealaíontóirí ó domhan cheol traidisiúnta na hÉireann agus tá saothar curtha i láthair aige in amharclanna agus ag féilte náisiúnta ar fud na hEorpa, Mheiriceá Thuaidh agus na Seapáine. Agus é ar dhuine de na chéad bhaill de Cran, tá saothar taifeadta agus tugtha ar camchuairt go fairsing aige leis an ngrúpa. Tá dhá albam aonair eisithe aige freisin.

Le linn na 1990idí, bhí Desi páirteach i gcúpla tionscadal ceoil idirnáisiúnta, lenar áiríodh Hent St Jakez (inar úsáideach ceol agus focail chun scéal na hoilithreachta go Santiago de Compostela a insint) agus The West Wind (tionscadal faoi urraíocht amharclann La Villette i bPáras agus amharclann Quartz in Brest inar baineadh leas as meascán traidisiúin cheoil agus a bhí ar siúl mar chuid de L'Imaginaire Irlandaise). I measc mórthionscadail eile dá chuid, tá La Traversée (2001), Senegal to Donegal (2002) agus Buffalo in the Castle (2009) ina ndearnadh iniúchadh ar na naisc atá ann idir ceol na hÉireann agus ceol seanstíle Mheiriceá.

Roimh an gceapachán seo mar Ealaíontóir Traidisiúnta Cónaithe in UCC, d'oibrigh Desi mar léachtóir lánaimseartha leis an Ionad Idirnáisiúnta um Léann Ceoil in Ollscoil Newcastle. Tá roinnt alt foilsithe aige faoi ghnéithe sóisialta agus ageistéitice cheol traidisiúnta na hÉireann agus foilsíodh a leabhar Call to the Dance in 2015 (Pendragon Press, Nua-Eabhrac) ina dtugann sé léargas ar an gceol damhsa agus ar an saol sochpholaitiúil sa Bhriotáin.

←Fill ar ais go dtí an nuacht