Tá cáil idirnáisiúnta ar Iarla Ó Lionáird mar amhránaí, mar léiritheoir agus mar chumadóir. Ceapadh é mar an chéad Ealaíontóir Traidisiúnta Cónaithe i gColáiste na hOllscoile Corcaigh (UCC) i Meán Fómhair 2013.

Ghlac sé páirt le linn na bliana i sraith léirithe ar a n-áirítear ceolchoirm le Steve Cooney san Aula Maxima in UCC i mí Dheireadh Fómhair 2013, comhshaothar in éineacht le cór UCC inar léiríodh cóirithe nua ceoil den chéad uair, agus comhshaothar eile in éineacht le Ceolfhoireann Gamalan UCC. Bhí Ó Lionáird ina theagascóir amhránaíochta ar an sean-nós agus ina léachtóir leis. Thug sé Léacht Chuimhneacháin Sheáin Uí Riada uaidh in 2014, a dhírigh ar an tionchar a d’imir ‘Ballyvourney Collection’ le A.M. Freeman ar chleachtas na hamhránaíochta traidisiúnta i nGaeltacht Mhúscraí.

Ba i gCúil Aodha, croícheantar an cheoil i nGaeltacht Chorcaí Thiar, a d’fhás Iarla Ó Lionáird aníos agus is ann a d’fhoghlaim sé a cheird. Idir thaifead eiseamláireach an amhráin ‘Aisling Gheal’ a rinne sé go luath ina shaol oibre agus na taifeadtaí agus na léirithe nuálacha uile a rinne sé le Afro-Celt Sound System, fágann comhthionscadail Uí Lionáird agus an cumasc nuálach a dhéanann sé idir traidisiúin an tsean-nóis agus an nuacheoil leictreonaigh go bhfuil sé ar cheann de na healaíontóirí is cruthaithí, is spreagúla agus is uaillmhianaí i gceol an lae inniu. I dteannta a chuid saothar aonair, tá sé ina bhall freisin de The Ghost Trio agus The Gloaming. Tá an t-eolas is déanaí faoina chuid oibre le fáil ar a shuíomh idirlín http://www.iarla.com

Bhunaigh an Chomhairle Ealaíon, i gcomhar le Coláiste na nEalaíon, an Léinn Cheiltigh agus na nEolaíochtaí Sóisialta (UCC), agus leis an Scoil Ceoil agus Amharclannaíochta (UCC), an tEalaíontóir Traidisiúnta Cónaithe ag Coláiste na hOllscoile Corcaigh in 2013.

←Fill ar ais go dtí an nuacht