Tá ríméad ar an gComhairle Ealaíon faighteoirí Dhámhachtain na Chéad Ghlúine Eile 2022 a fhógairt.
Bronntar sparánachtaí na Chéad Ghlúine Eile ar ealaíontóirí atá ag teacht chun cinn san uile dhisciplín ag pointe luath ach ríthábhachtach ina ngairm. Tugann an dámhachtain acmhainn d’ealaíontóirí an t-am a chaitheamh lena saothar a fhorbairt agus le bheith ábalta léiriú don domhan mór a gcumas cleachtas sainiúil agus muiníneach a chur chun cinn agus a neartú. Léirigh na faighteoirí rathúla ar bhealach iontach an dóigh a n-athróidh an dámhachtain agus an infheistíocht airgeadais ag an bpointe ama seo chun feabhais iad ar mhaithe leis an gcéad chéim eile dá bhforbairt ealaíne a bhaint amach.
Dúirt Stiúrthóir na Comhairle Ealaíon, Maureen Kennelly, “Tá ríméad orm le réimse agus le héagsúlacht na n-ealaíontóirí óga seo a bhfuil na dámhachtainí seo faighte acu. Tugann na dámhachtainí seo am luachmhar do na healaíontóirí a nglór ealaíonta a chothú, a gcleachtas a fhorbairt agus tabhairt faoina bhfís. Táim ag tnúth leis an saothar ón gCéad Ghlúin Eile a fheiceáil.”
Bronnadh 20 sparánacht ar ealaíontóirí ó Lú go Maigh Eo, agus ó Chorcaigh go Loch Garman, atá ag saothrú i Rannpháirtíocht sna hEalaíona; sa Damhsa; sa Litríocht, sa Cheol; san Amharclannaíocht, sna Ealaíona Traidisiúnta, sna hAmharc-ealaíona agus Daoine Óga, Leanaí agus Oideachas, chun tacú lena gcleachtas agus lena n-uaillmhian mar réaltaí a bhfuil gealladh mór fúthu sna healaíona comhaimseartha in Éirinn. Gheobhaidh gach ealaíontóir dámhachtain €25,000 agus tugtar cuireadh dóibh páirt a ghlacadh i gcónaitheacht chomhchoiteann seachtaine in Ionad Tyrone Guthrie, Eanach Mhic Dheirg, in earrach 2023.
Liostáiltear an 20 Faighteoir thíos:
Is cruthaitheoir amharclannaíochta a bhfuil duaiseanna buaite aici í Áine O’Hara, a chruthaíonn saothar iontach agus leochaileach do agus faoi dhaoine ar minic iad a bheith fágtha amach as ealaíon agus spásanna amharclannaíochta traidisiúnta. Tá sí ag céim ríthábhachtach ina gairm faoi láthair agus í ag athshamhlú conas a chruthaíonn sí saothar tar éis gur diagnóisíodh go raibh fibrimiailge uirthi. Is céimí í O’Hara ón Institiúid Ealaíne agus Deartha, Dún Laoghaire.
***
Is cóiréagrafaí í Ali Clarke atá ag obair leis an damhsa agus leis an sorcas. Saintréith de shaothar Ali is ea a cur chuige láidir idirdhisciplíneach agus a paisean chun an t-idirphlé idir an pobal agus an taibheoir a fhiosrú. Ligfidh an dámhachtain seo do Ali fiosrú a dhéanamh ar fhormáidí tumthacha le haghaidh taibhithe. Faoi láthair, tá Ali ag obair ar thaibhiú damhsa agus sorcais arna choimisiúnú ag Courthouse Arts Centre (Ionad Ealaíon Theach na Cúirte) le haghaidh Dheireadh Fómhair 2022 agus ag ullmhú le haghaidh aonréad damhsa le léiriú den chéad uair in Mermaid Arts Centre (Ionad Ealaíon na Maighdine Mara) in 2023.
***
Rugadh Alice Kinsella i mBaile Átha Cliath in 1993 agus tógadh i gContae Mhaigh Eo í, mar a bhfuil sí ina cónaí anois. Bhí a paimfléad filíochta Sexy Fruit (Broken Sleep Books) ina Dhíolaim Earrach 2019 de chuid Chumann na Leabhar Filíochta. Chuir sí eagar ar Empty House: poetry and prose on the climate crisis (Doire Press, 2021), agus foilseofar céadsaothar neamhfhicsin chruthaithigh Kinsella Milk ag Picador in earrach 2023.
***
Rugadh Aoife Ní Bhriain i mBaile Átha Cliath i dteaghlach ceoltóirí, agus bhunaigh sí í féin mar dhuine de na ceoltóirí is ildánaí dá glúin. Is seinnteoir veidhlín agus fidle í, a bhfuil duaiseanna buaite aici, agus tá comhoibriú déanta aici le healaíontóirí ó raon ollmhór seánraí amhail ceol traidisiúnta, snagcheol, ceol clasaiceach agus ceol comhaimseartha. Tá spéis ar leith ag Aoife a tógáil sa cheol traidisiúnta agus an ceol clasaiceach a mheascadh agus é a chur i láthair ar bhealaí nua dá lucht féachana.
***
Is ealaíontóir iad Chanelle Walshe atá ina gcónaí agus ag obair i mBaile Átha Cliath. Bhain siad céim amach ó Choláiste Náisiúnta Ealaíne is Deartha, Baile Átha Cliath, in 2010 agus ó Chúrsa Comhfhreagrais de chuid Turps Banana Art School in 2019. I measc na dtaispeántas a rinneadh le deireanais tá Taispeántas Dhámhachtain Hennessy Craig, an tAcadamh Ibeirneach Ríoga, Baile Átha Cliath 2021, WE CAN DANCE, Iarthar Chorcaí, 2021, agus ARTWORKS ag Ionad Visual, Ceatharlach, 2019. Bhailigh an Chomhairle Ealaíon agus Coláiste na Tríonóide, Baile Átha Cliath, a saothar. Beidh a gcéad seó aonréid ar siúl i nDánlann Chathair Luimnigh, in earrach 2023.
***
Is déantóir amharclannaíochta de bhunadh Hong Cong agus na hÉireann Choy-Ping Clarke-Ng 吳彩萍 agus is dearthóir seit, cultacha agus físe iad a bhfuil Duais Linbury buaite acu. I measc a spéiseanna san amharclannaíocht tá fiosrú a dhéanamh ar fhéiniúlachtaí atá rangaithe de réir cine agus atá aiteach, socheolaíocht na hÉireann agus gach rud osréalach. Dhear siad d’ionaid, lena n-áirítear Amharclann na Mainistreach, Bristol Old Vic agus Singapore Repertory Theatre.
***
Is péintéir í Ciara Roche atá lonnaithe i gCo. Loch Garman. I measc na dtaispeántas a rinneadh le déanaí tá MATAIRLANDIA – World Trade Centre – Jakarta agus Selasar Sunaryo - Bandung in Indinéis 2022, Generation 2022 – Butler Gallery (Dánlann an Bhuitléaraigh) 2022, Hennessy Craig Exhibition – an tAcadamh Ibeirneach Ríoga 2022. le deireanas… (aonréad) ag mother’s tankstation Gallery 2021 agus Ochre (beirt) ag Ionad Ealaíon Loch Garman 2021. Rinneadh í a ghearrliostú le haghaidh Dhámhachtain dhébhliantúil Hennessy Craig agus bhuaigh sí duais phéintéireachta KM Evans in 2022. In 2020 bhuaigh sí Duais Éigse do Chéimithe le Féile Ealaíon Cheatharlach dá saothar in ARTWORKS, Ionad Visual.
***
Is amharc-ealaíontóir é Cóilín O’Connell (a rugadh in 1990) ó Bhaile Átha Cliath. Ina chleachtas idirdhisciplíneach ghlac sé le modhanna cartlannaithe, cnuasaitheoirí, seandálaithe, paimfléadaithe agus mangairí contrabhanna chun táirgeadh eolais agus tógáil insinte a fhiosrú. Úsáideann sé déantús íomhá, obair allamuigh agus scríbhneoireacht mar bhunús le saothair a dhéanamh i bhfíseán, suiteán agus foilsitheoireacht.
***
Is cumadóir agus ceoltóir é Darragh Kelly. Tá spéis aige i ndialachtaic dhosháraithe rudaí fíorúla vs. rudaí fíora, suibiacht seachas oibiacht, a bhfuil áiféiseach, eacstaiseach, críonadh an nuacheoil, agus saol úd eile na tonúlachta. I saothar a rinne sé le déanaí, baineann sé úsáid as intleacht shaorga, ag féachaint le haschur líonraí néaracha a ath-ionchorprú mar orgáin sheachtracha den chorp – corp a bhfuil an iomarca de ann.
***
Is ealaíontóir é David McGovern atá gafa go sóisialta agus is oideachasóir é ó Lú. Oibríonn sé le híomhá ghluaiste, fuaim agus téacs chun spás a chruthú don fhéinfhiosrú, don mhachnamh agus don tuairimíocht. Tá sé paiseanta faoi scrúdú a dhéanamh ar an méid atá coiteann inár n-eispéiris, fiú má tá an chomhchosúlacht sin doiléir agus an-speisialta. Ina shaothar reatha, HARDCARE, scrúdaítear eispéiris ar an imeall agus atá claonaíoch ar an gcúram sláinte agus féinchúram trí lionsaí aiteacha, míchumasacha agus cibirfhimineacha.
***
Is ceoltóir il-uirlise ó chontae Mhaigh Eo í Éadaoin Ní Mhaicín, a bhfuil neart duaiseanna buaite aici. Bhí sí ar ardáin atá chun tosaigh ar leibhéal domhanda, amhail Broadway, Páirc an Chrócaigh, RDS, Marlay Park, an Ceoláras Náisiúnta, an Barbican Theatre i Londain, agus ag Áras an Uachtaráin chun seinm ar iarratas an Uachtaráin, Micheál D. Ó hUigínn. Seinneann Éadaoin le Ceolfhoireann Náisiúnta Cheoil Tíre na hÉireann agus bhí sí ar an iomad stáisiún raidió/teilifíse idirnáisiúnta, lena n-áirítear RTÉ, BBC, Virgin Media One agus TG4.
***
Is amharc-ealaíontóir í Ellen Duffy arb as Baile Átha Cliath é agus atá ina cónaí ansin. Tá Ellen sna luathchéimeanna dá gairm bheatha agus thaispeáin sí a saothar i roinnt taispeántas ar fud na tíre. Fuair sí céim ó Ollscoil Teicneolaíochta Bhaile Átha Cliath in 2019, agus roghnaíodh í le haghaidh Dhámhachtainí Amharc-ealaíon Chumann Ríoga na hÉireann agus bhronn an tAcadamh Ibeirneach Ríoga Dámhachtain Stiúideo do Chéimithe uirthi. Is í ealaíontóir cónaithe an Draíocht í don tréimhse 22/23 agus tá sí ag ullmhú le haghaidh a céad taispeántas aonréid sa Draíocht in earrach 2023.
***
Is scríbhneoir í Francesca Bratton atá ina cónaí i Maigh Nuad. Bhí a saothar le feiceáil in PN Review, Blackbox Manifold, Wild Court agus in áiteanna eile. Ina leabhar turgnamhach, Stronger than Death (John Murray, ag teacht), measctar cuimhní cinn agus beathaisnéis, ag rianú shaol an fhile Hart Cane agus a mháthar, Grace.
***
Is as Gaillimh do John Patrick McHugh. Bhí a shaothar le feiceáil in Granta, The White Review, The Tangerine, Banshee, Winter Papers, agus The Stinging Fly. D’fhoilsigh 4th Estate a chéad bhailiúchán de ghearrscéalta, Pure Gold.
***
Is ealaíontóir, taighdeoir agus oideachasóir iad Léann Herlihy atá lonnaithe i mBaile Átha Cliath. Casann croílár modheolaíoch a gcleachtais timpeall ar staidéir acadúla sa teoiric aiteach agus eipistéimeolaíochtaí feimineacha a úsáideann siad i gcomhar le gníomh beo, taibhiú, físeán, dealbhóireacht agus téacs.
***
Is taibheoir, éascaitheoir agus déantóir amharclannaíochta í Martha Breen ó Chill Mhantáin. Is céimí í ó Lir Academy (Acadamh Lir) 2018. Tá sí ina Stiúrthóir Ealaíne ar Mr. Sands Youth Theatre, Bré, ó 2020. Is é a haidhm ealaíonta obair a dhéanamh a mheascann téacs le gluaiseacht mar uirlisí le haghaidh ceapadóireachta, ach, an rud is tábhachtaí, cruthaitheacht chomhoibríoch. Mar thaibheoir agus seifteoir, d’oibrigh sí le hAmharclann an Gheata, Rough Magic, Amharclann na Péacóige, Backstage Theatre, MALAPROP, Gúna Nua, Téatar Náisiúnta, agus Fishamble Theatre Co. Is ball bunaidh í de Broad Strokes, agus stiúir sí Fighting Words de chuid Mermaid Arts Centre (Ionad Ealaíon na Maighdine Mara) in 2021 agus 2022.
***
Is scríbhneoir agus aisteoir í Mary-Lou McCarthy atá ag obair san amharclannaíocht, scannánaíocht/teilifís agus raidió, ag díriú go háirithe ar shaothar do lucht féachana óg. In 2020, choimisiúnaigh clár “Ready, Steady, Show!” de chuid The Civic í chun “The Dead Letter Office” a fhorbairt. Scrúdaítear sa dráma téamaí na himirce agus an mhuintearais d’aoisghrúpaí 9+ agus léireofar den chéad uair é i nDeireadh Fómhair 2022.Is Gaeilgeoir líofa í Mary-Lou a ghnóthaigh céim i Léann na Drámaíochta agus na hAmharclannaíochta i gColáiste na hOllscoile, Corcaigh. Tacaíonn Tionscnamh Meitheal de chuid Branar lena cuid oibre. Tá sé lonnaithe i gContae Mhaigh Eo
←Fill ar ais go dtí an nuacht