Tá an tionscnamh seo bunaithe ar na príomhspriocanna atá le fáil i straitéis na Comhairle Ealaíon, Saothar Ealaíne Iontach a Tháirgeadh, agus beartas amharclannaíochta reatha na Comhairle Ealaíon, a fhéachann le tacaíocht a thabhairt d’ealaíontóirí amharclannaíochta ag gach céim dá ngairmeacha beatha chun saothar den scoth a chruthú a théann i bhfeidhm go forleathan agus go domhain ar an bpobal. I bhfianaise na nithe seo, agus próiseas comhairliúcháin, tá tograí á lorg ag gComhairle Ealaíon ina gcomhoibrítear leis an mbonneagar reatha chun tacaíochtaí léiriúcháin breise faoi threoir na n-ealaíon a chur ar fáil don earnáil amharclannaíochta neamhspleách, go háirithe iad siúd a fhaigheann Dámhachtainí Tionscadail agus Maoiniú Deontais do na hEalaíona de chuid na Comhairle Ealaíon.

Déanfar iarratais a mheas ó ealaíontóirí gairmiúla amharclannaíochta* atá in ann dea-theist sa léiriú amharclannaíochta a thaispeáint agus comhpháirtíochtaí saineolais le heagraíocht amháin ar a laghad a fhaigheann Maoiniú Straitéiseach, Comhpháirtíochta nó Ionad Ealaíon na Comhairle Ealaíon ag a bhfuil dea-theist shuntasach i léiriú agus i dtaibhiú amharclannaíochta do lucht féachana e.g. cuideachtaí léiriúcháin, féilte, ionaid ealaíon.

*Chun críche na scéime seo, déantar ealaíontóir gairmiúil amharclannaíochta a shainmhíniú mar aon duine aonair atá ag saothrú mar ealaíontóir gairmiúil i gcáil chruthaitheach i gcomhthéacs na hamharclannaíochta, agus atá aitheanta sa cháil sin ag a p(h)iaraí – e.g. stiúrthóir, déantóir amharclannaíochta, aisteoir, drámadóir, dearthóir, léiritheoir cruthaitheach nó aonán léiriúcháin nach bhfaigheann Maoiniú Straitéiseach.

Cuspóir na dámhachtana

Is é cuspóir an tionscnaimh tacaíochtaí seirbhísí léiriúcháin d’ardchaighdeán faoi threoir na n-ealaíon a chur ar fáil don earnáil amharclannaíochta neamhspleách, ar bhonn phíolótach ar feadh dhá bhliain, agus an leas is fearr a bhaint as na hacmhainní agus na líonraí atá ann cheana féin i bhforbairt, léiriú agus camchuairt na hamharclannaíochta.