Mar fhreagra ar an gcéim dheiridh de Dheich mBliana na gCuimhneachán, tá clár náisiúnta, Ealaíon 2023 beartaithe ag an gComhairle Ealaíon, gairm oscailte ar ealaíontóirí agus ar eagraíochtaí ealaíon, chun ionadh a chur orainn agus chun an stát a athnuachan.

I gcomhpháirt le agus le tacaíocht ón Roinn Turasóireachta, Cultúir, Ealaíon, Gaeltachta, Spóirt agus na Meán, beidh an glaoch ar siúl i 2022; fógrófar agus cuirfear tús le clár deiridh i 2023; is deis uathúil í d’ealaíontóirí athbhrí a chur i samhlaíocht na hÉireann agus féachaint ar Dheich mBliana na gCuimhneachán ó dhearcthaí nua trí thograí uaillmhianacha a chruthú.

Cuirfidh an clár seo leis an gclár Ealaíon 2016, a chuir an Chomhairle Ealaíon i láthair roimhe le tacaíocht ón Rialtas.

Gairm Oscailte ar ealaíontóirí agus ar eagraíochtaí ealaíon na hÉireann chun tionscadail chomhoibritheacha cheannródaíocha atá dírithe ar an bpobal a chruthú a bhfuil uaillmhian, tionchar agus scála ag baint leo a spreagann plé, agus a ghríosaíonn nó a thugann freagra i dtaca le háit agus féiniúlacht mar chuid d’Éirinn na linne seo.

Is clár é Gairmeacha Oscailte d’ealaíontóirí agus d’eagraíochtaí ealaíon chun a gcleachtas a fhorbairt agus a athrú ó bhun agus aird a tharraingt ar a saothar don phobal ar scála náisiúnta, agus ealaín ag a bhfuil próifíl ard a bheidh lárnach i saol daoine a chruthú.

Laistigh de chomhthéacs na dámhachtana seo, tagraíonn comhoibriú d’oibriú le healaíontóirí nó eagraíochtaí eile, nó d'fhéadfadh sé tagairt do chomhoibriú le pobail áite nó pobail chomhspéise. Tuigtear tionscadail lena mbaineann ‘scála agus uaillmhian’ mar shaothar nach féidir a bhaint amach i do chleachtas reatha, atá suntasach ó thaobh físe de, is cuma faoin scála fisiciúil, saolta nó cainníochtúil. 

D’fhéadfadh na tionscadail a bheartaítear mar fhreagairt don Ghairm Oscailte a bheith i bhfoirm ealaíne ar bith nó d’fhéadfadh siad a bheith trasdisciplíneach nó idirdhisciplíneach.

Is le haghaidh tionscadail a thosófar in 2023 agus a chríochnófar in 2023, nó an chéad ráithe de2024, Gairmeacha Oscailte 2023 i gcomhpháirtíocht le Deich mBliana na gCuimhneachán.

Spriocdhátaí

Cuirfear tús leis an tréimhse inar féidir iarratais a chur isteach le haghaidh Gairmeacha Oscailte 2023 (Céim a haon) ar an 01 Feabhra 2022. Is é an spriocdháta don Scéim seo ná 5.30 p.m. Déardaoin, 03 Márta, 2022. Glacfar le hiarratais ar shuíomh gréasáin na Seirbhísí ar Líne de chuid na Comhairle Ealaíon.

An Próiseas iarratais

Tá dhá shnáithe i nGairmeacha Oscailte 2023, Snáithe Íochtair do dhámhachtainí idir €100,000-€250,000 chun tacú le tograí uaillmhéine ar mheán-scála, agus Snáithe Uachtair do dhámhachtainí agus €251,000-€500,000 chun tacú le cláir atá ar scála níos mó. Tá gach snáithe deartha chun tacú le tograí ar mhéideanna difriúla agus le cláir mar fhreagra ar Dheich mBliana na gCuimhneachán.

Féadfaidh duine ar leith nó eagraíocht iarratas amháin a dhéanamh ar Ghairmeacha Oscailte 2023, agus dá bharr ní féidir ach iarratas a dhéanamh ar cheann amháin den dá shnáithe atá ar fáil.

  Tabhair faoi deara go mbeifear ag súil go gcuirfidh na hiarratasóirí a n-éireoidh leo tús lena gcuid tograí tionscadail i 2023 agus go gcuirfear i gcrích nó go ndéanfar iad a sheachadadh gan a bheith níos déanaí ná an chéad ráithe de 2024 de réir na bliana deiridh de Dheich mBliana na gCuimhneachán.  

Soláthrófar sonraí iomlána an phróisis iarratais i dtreoirlínte na scéime ón 1^ú Feabhra 2022.

Treoirlínte

Tá an dámhachtain oscailte do dhaoine aonair agus d’eagraíochtaí ar cónaitheoirí de chuid (Phoblacht) na hÉireann iad. Bíonn cásanna eisceachtúla ann nuair a ghlacann an Chomhairle Ealaíon le hiarratais incháilithe ó dhaoine nach cónaitheoirí de chuid (Phoblacht) na hÉireann iad. Sula n-admhódh an Chomhairle Ealaíon go bhfuil iarratas den sórt sin incháilithe, áfach, bheadh ar an gComhairle a bheith sásta go gcuirfeadh torthaí togra den sórt sin le healaíona (Phoblacht) na hÉireann. Ní mór do thograí a fhaightear ó eagraíochtaí a fhaigheann maoiniú ón gComhairle Ealaíon faoi Mhaoiniú Straitéiseach, Comhpháirtíochta nó d'Ionaid Tionóil fianaise a sholáthar gur tionscadal eisceachtúil atá i gceist agus go bhfuil sé taobh amuigh de shainchúram a ngníomhaíochtaí maoinithe.

Clinic Maoinithe

Reáchtálfar clinic maoinithe Gairmeacha Oscailte 2023 ina gcuirfear eolas ar fáil d’iarratasóirí ar an gCéadaoin 2^ú Feabhra 2022 ag 2 p.m.

Chun clárú le haghaidh chlinic Gairmeacha Oscailte cliceáil anseo.